ضد التيار (الرجالة يعنى)جامد مووووت للبنات والاولاد

مرات ابنى.... حبيبتى... نفسى ارضيكى
وفى عز الضهر.. يجى 1000نجمة ..ح اوريكى
وان جيتى فى يوم عليا... ماتخافيش
حأقول مسامحاكى...وفى قلبى
.. حادعى عليكى
اللى ماشفتهوش فى العقربة ...شوفته فيكى
يجيكى.. ويحط عليكى..
وموش ح اسيبك ..فى يوم من الايام... حاوريكى
يا..أنا ..يا..أنتى فى بيت ابنى
...حتروحى منى فين
والله لاربيكى..
مرات ابنى ..حبيبتى... نفسى ارضيكى
خناقات الستات مع بعض ليها طعم تانى
لما راجل يتخانق مع راجل بيطفحوا الدم ولو كان اسكندرانى فالقول المشهور شيلوه من عليا لأقطعه
اما لو الخناقة حريمى فدائما السؤال يطرح نفسه..... فين يوجعك?..ولو لزم الامر قبقاب ينهى الموضوع زى قبقاب شجرة الدر
عراك النساء قلما يكون باليد ..فغالبا تستخدم المرأة عقلها اكثر
دعونا من هذا ولنبدء من الاول
هو احنا بنتكلم بالفصحى ليه خلوا البساط احمدى
ونتكلم بالبلدى احسن
حماتى عايزة ارضيكى
وواضح انها معركة بين اتنين ستات الفوز فيها (للاصلح)
بينما المعركة بين اى ست وراجل الفوز فيها( للاقوى) وااقصد بالاقوى اللى يقدر يمسك الساطور ويقطع ويشرح ويعبى فى الاكياس البلاستيك
واسألوا نفسكم سؤال..
كام راجل طاوعه قلبه يمسك ساطور ويقطع?.....
طبعا الاجابة ..ولا واحد
طيب وكام ست عبت جوزها فى الاكياس البلاستيك?.. ده طبعا باستثناء الزوجات اللى بياكلوا دراعات اجوازهم .....
والاجابة ماتعدش
لدرجة ان شركات الاكياس البلاستيك بقت تكتب على كل كيس تحذيرغير صالح للاستهلاك الادامى
وخصوصا بعد ازمة اختفاء الاكياس البلاستيك بعد دخولها كشئ اساسى فى جهاز العروسة لزوم المستقبل
انا طبعا موش باتهم الستات فى حاجة لاسمح الله لكن واضح ان فيه تيار قوى ضد الرجالة بدء ينموا داخل القهوة
ابتدى بمواضيع ماكناش نسمع عنها زى موضوع مميزات العزوبية للبنات وبعدين ..مميزات العزوبية للعوانس ....المرأة الذكية تربى جوزها بعصاية الغلية
واقعدوا فى الدولاب وبلاش جواز....
من الاخر كل المواضيع على الراجل وضد الجواز
وحتى لو الجوازة ندامة ...ليه التشائم ده ليه مايكونش فى جوازة تانية وبلاش خايفة من كلام الناس على راى عم جورج عصره وأوانه كلام الناس لابيقدم ولا يأخر كلام الناس ملامة وغيرة موش اكتر بجد انا احتارت مع الستات
لو اتجوزوا .....يشتكوا مر الشكوى.... جوزى موش زى الاول... مابقاش يحبنى... بطل يقولى بحبك ..25مرة فى اليوم..زى زمان...ومن يوم مااتجوزنا بقى بخيل مابقاش يرنلى عالمحمول زى الاول... ووو.........هلما جر.. من نوعية الشكاوى دى
ولو مااتجوزوش ...هاتك اشاعات على الجواز..( قعدة خزانة ولاجوازة ندامة)
ولو فيه راجل اتجنن وفكر يتجوز... تلاقى الخطط الحربية والدسائس السرية والنصائح تتوالى على المسكينة اللى حاتتجوزه
ابتداء من... قصقصى طيرك لايلوف بغيرك ...لذا لازم على كل ست تتعلم ازاى تقشط جيب جوزها اول باولوالحمار اما يشبع يبعزق علايقه(اكله)..وطبعا معروف مين الحمار
وضل راجل ولاضل حيطة..وكمان ساوا بين الراجل والحيطة مع الفارق ان الحيطة ممكن تقع لوزاد الخبط والرزع عليها
خدتك عواذ خدتك لواذ خدتك اكيد بيك الناس كدت انا روحى...يلا تستهلى علشان تحرمى تكيدى فى الناس
وتتوالى الامثلة الشعبية واهو برضه فى الاول والاخر..الست هى الغلطانة.. موش برضه قعدة الدولاب كانت احسن
اقلب القدرة على فمها تطلع البنت لامها شايف المثل قد ايه فخور ان البنت لامها
بعكس المثل القائل ابنك على ماتربيه وجوزك على ماتأخديه واضح ان الستات وخدانا مقاولة من واحنا صغيرين
حد فيكم سمع اغنية الواد قلبه بيوجعه وعاوز حد يدلعه..هنا مربط الفرس الراجل محتاج دلع وهى دى نقطة ضعفه والست الذكية هى اللى تعرف نقط ضعف جوزها وبكده تكسبه من غير عصاية الغلية ولا ارشادات طنط زكية زكريا
لكن كتير من الستات بتتأخر فى فهم نقطة الدلع دى وغالبا مابتدلع جوزها متأخر لما الراجل بيحمل لقب مرحوم وتبدء تدلعه فى الجنازة ابتداء من ياسبعى ياجملى وانتهاء بيا ميت ونفسك فى اللحمة يااخويا
وكم من رجل تمنى ان يسمع تلك الكلمات الرقيقة من حرمه المصون ..قبل مايتكل على الله
وانا واثقة لو كان سمعها وهى بتقول.. يامستتنى.. يامهنينى ....كان برضه حيموت.... قصدى حيموت من حبه فيها
على ايام سى السيد كانت امينة تقوله.. يجعل يومى قبل يومك ياسى السيد ..وكان سى السيد ساعتها يرد.. بعد الشر
الحوار ده لسة بيتكرر مع الاختلاف ان امينة(2008)بتقوله اشوف فيك يوم ياسى السيد
يارب يكون التوبيكـ ،،، عجبكمـ،،،